ممكن تحطي الفيشه؟؟
.
.
.
ممكن تقعد بقى؟؟ خيلتني؟؟!! دي انا ، كنت متنرفزه اوي منك..علشان رايح جاي قدام مكتبي ..وانا مش عارفه اركز خالص بسببك..
بصيت لي ..وكنت متوقعه مناقره تاني زي كل يوم ، بس الغريب انك كنت طيب جدا و قلتلي حاضر..
استغربت بصراحه وقلت في سري مش عوايده يعني ، بس بردو مفيش فايده..لقيتك قمت من علي مكتبك وجاي ناحيتي تاني فبصيت لك البصة المفتريه بتاعتي وعيني بتقولك "وبعدييييييييين بقى".
وقبل ما اتكلم فاجئتني بأغرب طلب في الدنيا
احم ..ساره ..ساره ..ممكن تحطي الفيشه
ممكن تحطيها النهارده بس حتى؟
من صدمتي من طلبك معرفتش ارد ..ولقيت نفسي غصب عني بقولك حاضر،وقعدت دماغي تودي وتجيب..خاصه لما لقيتك استأذنت من الشغل ومشيت.
قعدت افكر في طلبك الغريب واقول طب لو عايز يرخم عليا على تليفون البيت اكيد هعرف انه هو!!
وبعدين اصلا يعني انا مااديتهوش تليفون البيت !!
بعدين قلت لنفسي يمكن جابه من الدليل ..بس دي تبقى قله ذوق يعني لما يتصل بيا وانا مديتهوش الرقم..
ونويت بصراحه اني اتخانق معاك لو عملتها ، ونويت اقعد جنب التليفون علشان اول ما تتصل اوريلك شغلك بقى.
بس لما روحت البيت كنت نسيت، ونمت..ولقيت ماما بتصحيني بتقولي بابا عايزك..قلقت اوي ..خير ايه حصل..ليه بابا بيصحيني علشان عايزني؟ الموضوع ضروري للدرجه دي؟؟
دخلت على بابا لقيته بيقولي:
هو انتي معاكي حد في الشغل اسمه..............؟
قلت اووووبا يبقى عملها المجنون ، واستعديت علشان ادافع عن نفسي
وقلت له يابابا..بس والله انا معرفتش جاب رقم التليفون منين؟ وكنت ناويه....
ابتسامه بابا خلتني اقطع كلامي واستغربت وقلتله : ايه اللي حصل يا بابا؟
فقالي.....)ا عايز يخطبك
-........!!
ذهلت شويه..مش شويه انا ذهلت اوي بصراحه وفتحت في نوبه ضحك هيستيري
بابا اكيييييييييييييد بتهزر معايا..صح؟
بهزر؟!! وانا اعرف منين اسمه؟هو في هزار في الحاجات ديه يا بنت!!
انا فجأه سكتت وقعدت افتكر كل حاجه حصلت بينا، واحاول استوعب..لألألأصعب..لألألأده مستحيل ده احنا ناقر ونقير!!!
بابا سابني ونزل ..تقريبا افتكرني مكسوفه بس انا كنت مذهوله..وساعتها بس فهمت سر طلبك الغريب.
وتوته توته خلصت اول حدوته
حابه اشوف تعليقاتكم ومدى اعجابكم بها
وانتظرونى غدا فى حدوته جديده
Posted in:
زوجي ما زال حبيبي ♥
0 التعليقات :
إرسال تعليق