فستان الفرح

فستان الفرح
.
.

" فستان الفرح " .. مش فستان " زفاف " وبس .. لأ .. دا فعلاً فستان الفرح .. فستان الفرح يعني كل الفرحة متلخصة في توب أبيض وطرحة ..

فستان الفرح يعني الحاجة اللي بتحلم بيها كل بنت من أول ما تعرف تمسك القلم والورقة .. وترسم .. وتعبر بالفستان عن أحلام كتيييييرة اوي..

حلم انها تكون أميرة زي اللي بيحكوا عنهم في الحواديت ، حلم ان يكون ليها زوج وحبيب ... حلم ان يكون ليها اولاد .. حلم بزغاريد وطبول ونور ..

أحلام كتيرة اوي بتختصرها البنت في فستان وطرحة ...



النهاردة كنت بقيس فستان الفرح .. رغم إني شوفته قبل كده لما اختارناه سوا .. لكن النهاردة كان احساسي مختلف .

كنت حاسة كأني أول مرة بشوفه .. وحاسة برهبة وفرحة ومليون احساس مختلف وانا بقيسه ، و بدأت أحس بجد إني عروسة .. والموضوع بجد بقى !


وغصب عني عيني دمعت لما عيني جات في عين ماما أول ما لبست الفستان .. عينها كانت بتقول لي ياااااااه كبرتي يابنتي ..

وكانت بتقول لي الحمد لله ... شوفتك عروسة .. وكانت بتقول لي هتوحشيني وحاجات كتيييييير أوي .

وأنا كمان .. فجأة حسيت اني كبيرة بقى .. أنا عروسة !!


كلمة عروسة اللي ياما اتقالت لي من وانا صغيرة مختلفة أوي النهاردة ..

أنا فاضل لي كام يوم وابدأ حياة تانية مع انسان بحبه ، بس بردو .. هفارق ناس كتير بحبها ،

أنا هبقى عروسة بقى واقعد على الكوشة .. الكوشة اللي كنت بتكسف اطلع عليها علشان ابارك لعروسة قريبتي أو صاحبتي والناس هتقعد تبحلق فيا وتجيبني من ساسي لراسي ..

وياسلام بقى على البنات اللي كانت حاطة عينها عليك .. هتطلع فيا القطط الفاطسة وتقول في الآخر ما لاقاش غيير دي ؟؟ حتى لو انا ملكة جمال الكون .

احم ... بقولك ايه ؟ هو احنا لازم نعمل فرح ؟!!

Posted in: زوجي ما زال حبيبي ♥