عارف يعني ايه اكون مراتك ؟! .

عارف يعني ايه اكون مراتك ؟!
.
.
.

بكرة كتب كتبانا .. كتاب حياتنا اللي جاية .. بكرة هتنكتب شهادة ميلادي اللي بجد ، من بكرة هبقى مراتك ..

عارف يعني ايه اكون مراتك ؟!

دا مش بس معناه اني هعيش مع انسان اخترته واختارني .. مع انسان هيستحمل عصبيتي .. تعبي .. فشلي ، مع انسان هيفرح لكل حاجة حلوة اعملها مهما كانت صغيرة ، انسان أحس معاه اني " معايا " مش مع حد تاني ..

لما اكون مراتك دا معناه إني هضمن إني من حقي أناديك في آخر لحظة من عمري ، واطلب منك تقعد معايا شوية لأني خلاص بموت .. علشان عايزة اشبع منك .. وانت تقولي" لأ .. ما تقوليش كده "

وتزعل مني .. وأشوف في عنيك لحظتها كل حاجة حبيتها فيك .. المح خوفك عليا .. حبك ليا .. زعلك مني .. وابتسامتك وانت بتحاول تطمني ..

وأفضل باصة لك لحد ما روحي تروح لربنا .. وألمح ملامحي في ملامحك واتطمن .. لأني عارفة اني هفضل عايشة فيك وبيك زي ما كنت طول عمري عايشة بيك وليك

ياااااااااه يارب ما اتحرم من اني أعيش معاك اللحظة دي ، يااااارب لما اموت اكون مراتك ، ويكون اسمي جنب اسمك لحد ما نتقابل تاني .. في الجنة ان شاء الله

Posted in: زوجي ما زال حبيبي ♥